2023 MLA Inthlan hma khan khatih laia ZPM Leader, tuna Chief Minister Lalduhoma chuan, ZPM-in sorkarna a chan chuan sorkarin development bank a din dawn niin a sawi thin a. "Puih tlakte chu loan pung awm lo chi te, a pung tlem chi te pein sorkar chu quarantor-ah a tang ang a, tih takzeta dinchhuah tumte chuan an hlawhtlinpui em em ang," a ti. 

Hetihlai hian vawiin thlengin development bank din tumna sorkarin a la neilo thung a, bank din kawngah sorkar kaldan tur hriattheih a la ni lo.

Mizoram sorkar chuan 2024-2025 budget,  'Hand Holding Policy' head ah Rs. 200 crore a dah a, hei hian thlai thar leina tur pawh a huam tela ngaih a nih thu Finance Department hian a sawi a. "Thlai thar lei dan tur ruahmantu, Agriculture Department lamin ruahmanna fel fai an siam peih hunah a tul ang zela sum hi pek chhuah tura ruahman a ni," Finance Department chuan a ti.